တကီၢ်ခါ ပယီၤပဒိၣ်အသုးတဖၣ်အတၢ်ဟူးတၢ်ဂဲၤဖဲ သုးက့ ၅ ဟီၣ်က၀ီၤပူၤ

SPDC Army Camp inside Salawee River

ခ့ၣ်အဲၣ်ယူၣ် ခိၣ်နၢ်ဒီးပယီၤပဒိၣ်ခိၣ်နၢ်တဖၣ် ထံၣ်လိာ်စံးကတိၤသကိးတၢ်လၢ တၢ်မုာ်တၢ်ခုၣ်အဂီၢ် ၃ ဘျီလံဘၣ်ဆၣ် ပယီၤပဒိၣ်အသုးလၢ ခ့ၣ်အဲၣ်ယူၣ် ဟီၣ်က၀ီၤပူၤတဖၣ် အတၢ်ဟူးတၢ်ဂဲၤလၢ အထံးဘၣ်ဒွါဘၣ် ကမျၢၢ်တဖၣ်အိၣ်ဒံး၀ဲအဂ့ၢ် ခ့ၣ်အဲၣ်ယူၣ် ပှၤဘၣ်မူဘၣ်ဒါလၢ အဟူးဂဲၤဖဲ တၢ်မဲာ်ညါ ဟီၣ်က၀ီၤတဖၣ်တဲဖျါ၀ဲလီၤ.

ဖဲ စဲးပထ့ဘၢၣ် ၁၃ သီ ၂၀၁၂ နံၣ်အနံၤန့ၣ် ပယီၤပဒိၣ်အသုး ခမရ ၄၃၄ လဲၤဆီတလဲ၀ဲအပှၤအခါ ဟး၀ဲလၢဘုကျါအဃိ သ၀ီဖိအစံာ် ၅ လီၢ်ဖဲ မဲာ်ယဲာ်လံ လၢအမ့ၢ်၀ဲ ခီပူးကရူၢ် ထိၣ်ဖိပၢ်ဒၢ သ၀ီဖိတဖၣ် အစံာ်အံၤ ဘုသ့ၣ်တဖၣ်ဟးဂီၤဘၣ် ဒိ၀ဲဒၣ်န့ၣ်လီၤ. စံာ်ကစၢ်သ၀ီဖိတဖၣ် မ့ၢ်၀ဲ စီၤတ့ၣ်၀့, စီၤကၠ့ဘဲ, စီၤဖါတိၣ်, စီၤဖါယံၤထူဒီး စီၤဖါဆံးမူ သ့ၣ်တဖၣ်န့ၣ်လီၤ.

ဒီးဖဲ အီကူာ် ၁၅ သီအနံၤန့ၣ် သုးြတိၤ ၄၄ သုးခိၣ် မီၢ်မ့ကၠံၣ် ဟ့ၣ်လီၤဝဲ ထိၣ်ဖိပၢ်ဒၢ သ၀ီဖိတဖၣ် လံာ် ၂ ဒၣ်စ့ၣ်, စၢၢ်ဘိ ၂ ဒၣ်စ့ၣ်, ထိၣ်ဒံးဘိ ၇ ဘိန့ၣ်လီၤ. မ့မ့ၢ် ဖဲ အီကူာ် ၁၇ သီအနံၤန့ၣ် ပယီၤသုး ခမရ ၃၄၀ အပှၤသုးဖိ မီၣ်မီၣ်ကၠံၣ်ဒီး သၣ်နဲၣ်အူဃုာ်ဒီးအသကိး ၁၅ ဂၤဟဲလုၢ်အီၣ်၀ဲ ထိၣ်ဖိပၢ်ဒၢ သ၀ီဖိတဖၣ် လၢမ့ၤချီဒီးတဲ၀ဲလၢ အမၤန့ၢ်အသုးခိၣ်ခံဂၤအနံၤအိၣ်ဖျဲၣ်ဆၢက့ၤပှဲၤထီၣ်န့ၣ်လီၤ.

ဒ်တၢ်ကစီၣ်လၢ ခ့ၣ်အဲၣ်ယူၣ် ပှၤဘၣ်မူဘၣ်ဒါလၢအဟူးဂဲၤဖဲတၢ်မဲာ်ညါဟီၣ်က၀ီၤတဖၣ်ပာ်ဖျါ၀ဲအသိး ဖဲ စဲးပထ့ဘၢၣ် ၁၃ သီ ၂၀၁၂ နံၣ်အနံၤန့ၣ် ပယီၤပဒိၣ်သုး သုးခိးကီၢ်ဆၢ သုးရ့ၣ် ၁၀၁၄ ထုးကွံာ်အ သးဒီး သုးခိးကီၢ်ဆၢ နီၣ်ဂံၢ် ၁၀၁၂ လၢတၢ်တီခိၣ်ရိၢ်မဲအီၤလၢ သုးရ့ၣ်ခိၣ် အီၣ်လ့ဒီးသုးရ့ၣ်ခိၣ် ၂ ဖါဒီဘိ ဃုာ်ဒီးအပှၤ ၅၆ ဂၤအံၤ ဟဲထီၣ်အိၣ်က့ၤ၀ဲလၢ အလီၢ်ဒီး ဟံးဃုာ်စ့ၢ်ကီး၀ဲ ယီၢ်ပိၢ်ထၣ်ဒီးထံပ နၢ်ထၣ် တၢ်လီၢ်သ့ၣ်တဖၣ်န့ၣ်လီၤ.

နအဖသုး မၢ ြက့ဟ့ ခီပနံၣ်လၢ ကဟဲတ့ထီၣ်န့ၢ် သုးခိးကီၢ်ဆၢ သုးဟံၣ်ဖိဃီဖိ မိန်းမလိုင်း ဖဲ ကတၢတံးဒီး နိၣ်ဖီထံအဘၢၣ်စၢၤသ့ၣ်တဖၣ်န့ၣ် သူၣ်ထီၣ်၀ဲ၀ံၤ ၈ ဖျၢၣ်လၢအမ့ၢ် တၢ်ဆါဟံၣ် မိၢ်ဆံး ဖိဆံးဒၢးတဖျၢၣ်, ကျိချံပှာ်သၣ်ဒၢးတဖျၢၣ်, သုးရ့ၣ်ခိၣ်ဒီး သုးရ့ၣ်ခိၣ် ၂ အဒၢးခံဖျၢၣ်, သုးတမှံၤအိၣ်တၢ် လီၢ်တဖျၢၣ်, တၢ်ပာ်သိလ့ၣ်လီၢ်တဖျၢၣ်ဒီးတၢ်အီၣ်အလီၢ်တဖျၢၣ်န့ၣ်လီၤ. မ့မ့ၢ်အဂၤတဖျၢၣ်န့ၣ် တၢ်တသ့ၣ်ညါဘၣ်အီၤဒံးဘၣ်န့ၣ်လီၤ. တကးဒံးဘၣ်အမဲာ်ညါ တၢ်ရဲၣ်တၢ်ကျဲၤအိၣ်ဒံး၀ဲလၢ ကဆဲးသူၣ်ထီၣ်၀ဲ တၢ်သူၣ်ထီၣ်တဖၣ်လၢ နိၣ်ဖီထံ မုၢ်နုၤတကပၤဒံးန့ၣ်လီၤ.

စံးစ့ၢ်ကီး၀ဲဖဲ စဲးပထ့ဘၢၣ် ၈ သီ ၂၀၁၂ နံၣ်န့ၣ် ပယီၤအသုး သုးြတိၤ ၄၄ နဗဟ ၄၄၂ သုးခိၣ် မီၢ်တ့ၣ်အူ ကိးဖှိၣ်၀ဲ ကတၢတံး, ထံသဘျုၣ်ထၣ် သ၀ီသးပှၢ်ဒီးတဲ၀ဲလၢ ခ့ၣ်အဲၣ်ယူၣ် ဒီး သါခိၣ် သါနၢ် ထံၣ်လိာ်သးဆဲးစုမုၢ်ကျၢၢ် ၃ ဘျီလံအဃိ တဘျီအံၤန့ၣ်မ့ၢ်တၢ်လီၤတံၢ်လံ ခ့ၣ်အဲၣ်ယူၣ် သုးမ့ၢ်ဟဲဟး မ့ၢ်ဂ့ၤ မ့ၢ်ဟဲကွၢ်ကီတၢ်ထူဖျၢၣ်ထူတၢ်လိာ်ကွဲန့ၣ်သ့လံန့ၣ်လီၤ. ဘၣ်ဃးဒီးသုးခိးကီၢ်ဆၢ ဘံကၠံအဲးဖ် သုးတဖၣ်အိၣ်လၢ သါစုပူၤလီၤ, သါမ့ၢ်၀ံၤဒီး၀ံၤ၀ဲလီၤ.  မ့မ့ၢ်တၢ်ထုးကွံာ်သုးတခါ ခိၣ်နၢ်တၢ်ဖီခိၣ် မၢပအိၣ်ခိးကနၣ်ဒံး ပာ်ဖျါကဒီးမ့ၢ်၀ံၤ ကဒုးသ့ၣ်ညါက့ၤ၀ဲန့ၣ်လီၤ.

ဒီးဖဲ စဲးပထ့ဘၢၣ် ၁၄ သီ ၂၀၁၂ နံၣ်အနံၤစ့ၢ်ကီး ဘံကၠံအဲးဖ် သုးခိးကီၢ်ဆၢ သုးရ့ၣ်နီၣ်ဂံၢ် ၁၀၁၄ သုးရ့ၣ်ခိၣ် မီၣ်ခၠံး ကိးဖှိၣ်၀ဲ သ၀ီဖိလၢအအိၣ်ဖဲ ဘုသိၣ်ကီၢ်ဆၣ် ကၠီပါကရူၢ်တဖၣ်လၢ ကထၢအါထီၣ် သုးအဂီၢ် မ့မ့ၢ်အသုးလၢအထၢတ့ၢ်ဖဲအပူၤကွံာ် ၂၀၁၀ နံၣ်တဖၣ် ကပျဲဟးထီၣ်၀ဲဒီး လၢအ၀ဲသ့ၣ်တ ဖၣ်အတၢ်ထၢအါထီၣ်အသုးဖိခိၣ် သ၀ီဖိတဖၣ် တအဲၣ်ဒိးဆီၣ်ထွဲအီၤသနာ်က့ ထၢန့ၢ်ဆူၣ်၀ဲ ကၠီပါသ၀ီ ဖိ ၈ ဂၤ, မဲးြပံးဖိခံ ၄ ဂၤ, ထံဘီကီၣ် ၂ ဂၤဒီး ထံထီၣ်ခံ ၁ ဂၤန့ၣ်လီၤ.

ဒီးဖဲ စဲးပထ့ဘၢၣ် ၁၅ သီ ၂၀၁၂ နံၣ်အနံၤစ့ၢ်ကီး ပယီၤသုးကဘီယူၤတဘ့ၣ် ဟဲစီၢ်လီၤ၀ဲဖဲ မိၣ်လိၣ်ဒ့ သုးကလၢၤပူၤဖဲ ကီၢ်လူၢ်ဒၢ ဟီၣ်က၀ီၤ လူၤသီကီၢ်ဆၣ်ဒီး ဟဲစီၢ်လီၤကယံာ်၀ဲ​ ၂၄ မံးနံးဒီး ဟဲတၢ်ဂ့ၢ် တၢ်ကျိၤတခီ တၢ်တသ့ၣ်ညါဘၣ်အီၤလီၤတံၢ်လီၤဆဲးဘၣ်န့ၣ်လီၤ.

ခ့ၣ်အဲၣ်ယူၣ် ခိၣ်နၢ်ဒီး ပယီၤပဒိၣ်ခိၣ်နၢ်တဖၣ်ထံၣ်လိာ်အိၣ်သကိးလၢ တၢ်မုာ်တၢ်တခုၣ် ၀ံၤအလီၢ်ခံ တၢ်ဒုးတၢ်ယာ် မ့ၢ်တအိၣ်လၢၤသနာ်က့ ပယီၤသုးတဖၣ်အတၢ်ဟူးတၢ်ဂဲၤလၢ အမၤဘၣ်ဒိကမျၢၢ် ဖဲခ့ၣ်အဲၣ်ယူၣ် ဟီၣ်က၀ီၤပူၤတဖၣ် န့ၣ်အိၣ်ဒံး၀ဲအဖၢမုၢ်လီၤ.